Пойтахтимиз бадиий гимнастика бўйича Жаҳон Кубоги босқичига мезбонлик қилади

15-17 апрель кунлари Тошкент шаҳрида бадиий гимнастика бўйича Жаҳон кубогининг учинчи босқичи бўлиб ўтади. 

Мусобақада Арманистон, Австралия, Озарбайжон, Болгария, Колумбия, Буюк Британия, Грузия, Германия, Италия, Қозоғистон, Латвия, Янги Зеландия, Словения, АҚШ, Ўзбекистон каби 15 мамлакат вакиллари иштирок этишади. 

Ушбу нуфузли турнирда мамлакатимиз шарафини Токио Олимпия ўйинлари лицензианти, Осиё чемпиони, Осиё ўйинлари кумуш медал соҳибаси, Жаҳон кубоги босқичлари ғолибаси, жамоа етакчиси Сабина Ташкенбаева ва Осиё чемпиони Тахмина Икромова ҳимоя қилади. Иккала гимнастикачи ҳам Лилия Власованинг шогирди ҳисобланади. Шунингдек, гуруҳ машқларида жамоамиз янги таркиб билан чиқиш қилади. Таркибдан қуйидаги гимнастикачилар жой олишган: Шахзада Ибрагимова, Наргиза Жманиязова, Нилуфар Аъзамова, Мумтоза Исхакзода, Мария Пак ва Хуршида Абдурауфова. Спортчиларимиз Раъно Муҳамедова ва Нилуфар Шамуродова қўл остида мусобақага тайёргарлик кўришмоқда.

Жаҳон кубоги шу йили Хитойда бўлиб ўтадиган Осиё ўйинлари ва кузда бошланадиган Париж-2024 лицензион турнирлари учун тайёргарликнинг муҳим босқичини ҳам ўтаб беради.

Маълумот учун, Жаҳон кубогининг биринчи босқичи 18-20 март кунлари Грециянинг Афина шаҳрида, иккинчи босқич эса 8-10 апрель кунлари Болгариянинг София шаҳрида бўлиб ўтди. Навбатдаги уч босқич Тошкент (Ўзбекистон), Баку (Озарбайжон) шаҳарларида, шунингдек июнь ойи бошида Песаро (Италия)даги босқич билан якунланади.