ПРЕВЬЮ. Roland Garros 2019. Бугун ФИНАЛ: Грунт шаҳзодаси Қиролга қарши!

Франция пойтахти Париж шаҳри мезбонлигида ўтаётган турнирнинг сўнгги куни мухлислар иккитага финалга гувоҳ бўлишади. Аввалига аёллар ўртасидаги жуфтлик мусобақасининг финал учрашуви ўтказилади. Кейин эса эркаклар ўртасидаги яккалик турнирида чемпион аниқланади. 

Ҳал қилувчи финал учрашувида грунт, яъни қум қопламали кортлар қироли Рафаэль Надаль ATP рейтингининг 4-поғонасидан жой олган австриялик Доминик Тимга қарши кортга чиқади. Тимга нисбатан грунт турнирлар шаҳзодаси таъриф берилади. 

Испаниялик теннис афсонаси учун бу “Ролан Гаррос” турниридаги 15-мавсум ҳисобланади. Надаль 15 йиллик иштироки давомида фақат икки марта мағлубият аламини тотиб кўрган. Бугун у 12-титулини қўлга киритиш учун уриниб кўради. 2016 йилги “Ролан Гаррос” турнирининг учинчи босқичида у жароҳати сабаб ҳамюрти Марсель Гранольерсга қарши кортга чиқмаган. Бу мағлубиятга кирмайди. 

Надаль илк бор Парижда 2009 йилги турнирда мағлубиятга учраган. Рафа кутилмаганда  тўрт сет давом этган баҳсда Робин Сёдерлингга имкониятни бой бериб қўйган. Надаль бу йилги “Ролан Гаррос”да биргина Давид Гоффенга учинчи давра учрашувида битта сетни ютиб олиш имконини берди, холос. 

Грунт шаҳзодаси бўлган Доминик Тим сўнгги тўрт мавсумдан бери ҳар йили бир маротаба Надални грунт турнирида мағлубиятга учрата оляпти. Айнан шу ҳолат бу йилги финалга бўлган қизиқишни оширган. Ҳозирча ўзаро грунт қопламали турнирлардаги ҳисоб - 6:4, Надаль фойдасига. Кўрамиз, бугун кимнинг кўчасида байрам бўлар экан: Қиролними ёки унинг ворисини?