Prezident Kubogi. Бугун 3-турда ўзбек дербисига гувоҳ бўламиз

Дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этувчи Prezident Kubogi мусобақаси бош соврини учун баҳс олиб боришяпти. Бугун турнирда 3-тур учрашувлари ўтказилади. Кучлилар жам бўлган А гуруҳининг биринчи доскасида Нодирбек Абдусатторов (2777) қора доналарда яна бир истеъдодли гроссмейстеримиз Муҳиддин Мадаминов (2501)га қарши баҳс олиб боради. Ҳар икки шахматчи ҳам дастлабки икки турда ғалабага эришган. 

Икки ғалабага эга Жавоҳир Синдаров (2682) оқ доналарда FIDE байроғи остида қатнашаётган Михаил Никитенко (2490) билан ҳисоб-китоб қилади. Иккинчи рақамли шахматчи Парҳам Мақсудлу (Эрон, 2712)ни мағлуб эта олган ёш шахматчимиз Ортиқ Ниғматов (2419) эса 3-турда ҳиндистонлик Пранеш (2580) билан тўқнаш келади. 

Жами 13 нафар шахматчи 3-тур олдидан юз фоизлик натижага эришиб турибди. Уларнинг 5 нафари ҳамюртларимиз ҳисобланади. Икки ғалабага эришган Улуғбек Тиллаев (2303) бугун 1,5 очкога эга бўлиб турган гроссмейстеримиз Шамсиддин Воҳидов (2681)га қарши қора доналарда ўйнайди.