Prezident Kubogi. Нодирбек илк бор очко йўқотди, Синдаров дербида пешқадам билан дуранг ўйнади

Дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этувчи Prezident Kubogi мусобақаси бош соврини учун баҳс олиб боришяпти. А гуруҳида қўшимча кўрсаткичларга кўра пешқадамлик қилаётган Ортиқ Ниғматов (2447) бу турда гроссмейтеримиз Жавоҳир Синдаров (2682) билан дуранг ўйнади. Ҳар икки шахматчимиз ҳисобидаги очколар 3,5 тага етди. 

Тўртинчи турга қадар иккинчи ўриндан жой олган турнирнинг биринчи рақамли шахматчиси Нодирбек Абдусатторов (2777) кетма-кет учта ғалабадан кейин очко йўқотди. У ўзи сингари юз фоизлик натижа қайд этиб келган ҳиндистонлик Мурали Картикян (2625) билан муросага келди. Нодирбекда ғалаба учун яхшигина имконият юзага келганди, афсуски у кичик хато сабаб бундан фойдалана олмади. 

Гроссмейстеримиз Шамсиддин Воҳидов (2681) 4-турда қора доналарда россиялик Артем Усков (2430) билан дуранг қайд этди. Нодирбек Якуббоев (2668) оқ доналарда қирғизистонлик Элдияр Орозбаевни мағлубиятга учратди ва очколарини 3 тага етказиб олди. 

Бугун ўтказиладиган 5-тур олдидан турнир жадвалида Ортиқ Ниғматов 3,5 очко билан қўшимча кўрсаткичларга кўра карвонбошиликни ўзида сақлаб қолди. Нодирбек Абдусатторовдан очко тортиб олган Мурали Картикян иккинчи ўринга кўтарилиб олди. Нодирбекнинг ўзи учинчи ўринга тушди. Ҳиндистонлик Ниҳал Сарин, шунингдек, Жавоҳир Синдаров россиялик Иван Землянский ҳисобида ҳам 3,5 очкодан бор. 

Ўн олти нафар иштирокчи 3 очкодан жамғарган. Улар орасида ҳамюртларимиздан Улуғбек Тиллаев, Муҳиддин Мадаминов ва Нодирбек Якуббов ҳам бор. Турнирнинг иккинчи рақамли иштирокчиси эронлик таниқли гроссмейстер Парҳам Мақсудлу 3 очко билан 14-ўринни эгаллаб турибди.