Prezident Kubogi. "Ўзбек классико"сида қандай натижа қайд этилди? (Барча натижалар+турнир жадвали)

Дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этувчи Prezident Kubogi мусобақаси бош соврини учун баҳс олиб боришяпти. Бугун 6-турнинг марказий учрашуви 5-турдан сўнг пешқадамликни қўлга олган Жавоҳир Синдаров ҳамда мусобақанинг биринчи тартиб рақамли шахматчиси Нодирбек Абдусатторов ўртасида ўтказилди. Муросасиз кечган баҳсда томонлар муросага келишди ва ўз ҳисобларига ярим очкодан ёзиб қўйишди.  

Нодирбек Абдусатторов ва Жавоҳир Синдаров ўзаро 27 маротаба тўқнаш келишди. Шундан 9 тасида Нодирбек, 7 тасида Жавоҳирнинг қўли баланд келган. Бугунгиси билан қўшиб ҳисобласак, 11 та партияда дуранг натижа қайд этилган. 

Мусобақани кўтаринки руҳда ўтказаётган Ортиқ Ниғматов (2447) пешқадамнинг очко йўқотишидан унумли фойдаланиб қолди. У қора доналарда ўйнашига қарамай, эронлик гроссмейстер Амин Табатайи (2686)ни мағлубиятга учратди. Амин турнирда бешинчи рақам остида сараланган эди. Ниғматов 5-турда Нодирбек Абдусатторов (2777) билан дурангга имзо чекканди. 

Яна бир ўзбек дербисида Муҳиддин Мадаминов (2501) ва Шамсиддин Воҳидов (2681) ўзаро ҳисоб-китоб қилишди. Гроссмейстерларимиз учрашувида рейтинги юқорироқ бўлган Шамсиддин ғалаба қозониб, очколарини 4,5 тага етказиб олди. Бугун Нодирбек Якуббоев (2668) ҳам муҳим ғалабани қўлга киритди. Шахматчимиз россиялик гроссмейстер Михаил Никитенко (2490)дан устун келди. Иккинчи рақамли шахматчи Парҳам Мақсудлу (Эрон, 2712) ҳам бугун ғалабага эришди. У россиялик Иван Землянскийни таслим этди.    

Олтинчи турдан сўнг яна пешқадам ўзгарди. Ортиқ Ниғматов 5 очко билан қўшимча кўрсаткичларга кўра 1-ўринга кўтарилиб олди. Саҳа Нилаш (Ҳиндистон, 2458), Жавоҳир Синдаров, Ниҳал Сарин (Ҳиндистон, 2676) ва Санкалп Гупта (Ҳиндистон, 2539) ҳисобида ҳам 5 очкодан бор. Нодирбек Абдусатторов 4,5 очко билан 6-ўриндан жой олган.