Prezident Kubogi. Шахматда "ўзбек классико"си бошланди. Синдаров Абдусатторовга қарши!

Дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этувчи Prezident Kubogi мусобақаси бош соврини учун баҳс олиб боришяпти. Бироз аввал турнирнинг 6-тур учрашувлари бошланди. 

Турнинг марказий партияси биринчи доскада 5-турдан сўнг пешқадамликни қўлга олган Жавоҳир Синдаров ҳамда мусобақанинг биринчи тартиб рақамли шахматчиси Нодирбек Абдусатторов ўртасида ўтказиляпти. Икки шахматчини ярим очко ажратиб турибди. Абдусатторов кетма-кет икки дурангдан кейин қўшимча кўрсаткичларга кўра 6-ўринга тушиб кетди. 

Нодирбек Абдусатторов ва Жавоҳир Синдаров ўзаро 26 маротаба тўқнаш келишган экан. Шундан 9 тасида Нодирбек, 7 тасида Жавоҳирнинг қўли баланд келган. Ўнта партияда дуранг натижа қайд этилган. Бугун 27-учрашув ўтказиляпти. Ўзига хос "ўзбек классико"си!  

Мусобақани кўтаринки руҳда ўтказаётган Ортиқ Ниғматов (2447) айни дақиқаларда эронлик гроссмейстер Амин Табатайи билан оқ доналарда ўйнаяпти. У кеча 5-турда Нодирбек Абдусатторов (2777) билан баҳсда дурангга имзо чекканди. Яна бир ўзбек дербисида Муҳиддин Мадаминов ва Шамсиддин Воҳидов ўзаро ҳисоб-китоб қилишяпти.  

Бешинчи турдан сўнг Жавоҳир Синдаров 4,5 очко билан якка пешқадам бўлиб турибди. Саккиз шахматчи - Ортиқ Ниғматов, Мурали Картикян, Саҳа Нилаш, Ниҳал Сарин, Нодирбек Абдусатторов, Санкалп Гупта, Виталий Бернардский ва Сапармират Атабаев 4 очкодан жамғаришган. Абдусатторов қўшимча кўрсаткичларга кўра 6-поғонадан жой олган.

"Prezident Kubogi". 6-турнинг марказий партиялари:

Нодирбек Абдусатторов (GM, 2777) – Жавоҳир Синдаров (GM, 2682)  

Ортиқ Ниғматов (IM, 2447) – Амин Табатабаэи (GM, 2688)  

Муҳиддин Мадаминов (IM, 2501) – Шамсиддин Воҳидов (GM, 2681)  

Сапармират Атабаев (IM, 2520) – Ниҳал Сарин (GM, 2676)

Санкалп Гупта (GM, 2539) – Мурали Картикеян (GM, 2625)