Президент Кубогида пешқадам ўзгарди, ўзбек дербисида муросаю мадора

Мусобақада дунёнинг турли мамлакатларидан келган гроссмейстерлар бош соврин учун баҳс олиб боришяпти. Ҳиндистонлик Ниҳал Сарин (2701) турнирда биринчи рақам остида сараланган. У кеча ўтказилган 5-турда арманистонлик Шант Саргсянни мағлубиятга учратди ва турнир жадвалида 4 очко билан якка пешқадамга айланиб олди. 

Бунга ёш гроссмейстерларимиз Шамсиддин Воҳидов ва Муҳиддин Мадаминовнинг ўзаро дуранг ўйнагани сабаб бўлди. Тур олдидан бу икки шахматчимиз 3 очкодан жамғариб, мусобақада пешқадамлик қилишаётганди. Улар кучли учликда қолишди. Тўртинчи ўриндаги Данешвар Бардия ҳисобида 3 очко бор. Эронлик гроссмейстер 5-турда оқ доналарда яна бир шахматчимиз Абдималик Абдисалимов билан дуранг ўйнади. 

Бешинчи турда германиялик Фредерик Свен россиялик Александр Гришукни, франциялик Максим Лагарде украиналик Юрий Кузубовни мағлубиятга учратди. Бугун 6-тур учрашувлари ўтказилади. Соат 15:00`да бошланадиган турда Муҳиддин Мадаминов қора доналарда пешқадам Ниҳал Саринга қарши баҳс олиб боради. Шамсиддин Воҳидов қора доналарда Данешвар Бардия билан ҳисоб-китоб қилади. Абдималик Абдисалимов эса Юрий Кузубовга қарши дона суради.