Профессионал бокс: яна бир WBC камари Ўзбекистонда

Унда Тошкентнинг "Befit" клуби аъзоси Исломбек Пирманов озарбайжонлик Рауф Агаевга қарши мазкур камар учун рингга чиқди.

10 раундга мўлжалланган жангнинг илк раундларида кучлар тенг ҳолатда кўриниш олган бўлса, 3-4-раундлар ҳамюртимизнинг катта устунлиги остида ўтди. 5-раунднинг дастлабки дақиқасида ҳамюртимизнинг кучли зарбалари озарбайжонлик боксчини мувозанатдан чиқарди ва учрашувни техник накаут билан якунланишига олиб келди. Жанг якунида WBC йўналишининг МДҲ, Шарқий Европа ва Болтиқбўйи мамлакатлари бюроси мутасаддилари Исломбекка камарни тақдим этишди.

Профессионал боксдаги фаолияти мобайнида ҳозирча бирон марта мағлубиятга учрамаган қорақалпоғистонлик Исломбек Пирмановнинг ғалабаси шарафига мусобақада Ўзбекистон мадҳияси янгради.

Ушбу мусобақа доирасида мамлакатимизнинг бир қатор ёш боксчилари рейтинг жангларини ўтказишди. Улардан Абдуҳамид Ҳакимов, Нуриддин Эгамбердиев, Обиджон Тоҳиров, Хожиакбар Қодирохунов, Элдорбек Саидов, Тимур Мержанов ва Беҳруз Раҳмонов ғолибликка эришди.

Ғолибларни тақдирлаш маросимида Миллий Олимпия қўмитаси Бош котиби Ойбек Касимов, Ўзбекистон профессионал бокс федерацияси раиси Исроил Юнусов, бокс бўйича Олимпия чемпиони Муҳаммадқодир Абдуллаевлар иштирок этди.

Чемпионликка эришган боксчиларга Ўзбекистон профессионал бокс федерацияси сертификатлари топширилди.