Қадимий Чавгон ўйинимиз асосида шаклланган Поло спорт тури бўйича илк мусобақа бўлиб ўтди

Ўз қоидалари ва кўриниши жиҳатидан кўпкари ва хоккейга ҳам ўхшаб кетади. Ўйинчилар – махсус суворилар отга миниб, миллий чавандозлик кийимларида майдонга тушганлар. Улар икки гуруҳдан иборат бўлиб, ўртада чавгон тўпи талаш бўлган. Ҳар икки томондан 5-6 нафардан ўйинчи қатнашиб, рақиб дарвозасига ким қанча кўп тўп киритса, ўйин сўнгида ўша томон ғолиб топилган.

Тарихий манбаларга кўра: Чавгон ўйини Марказий Осиё халқлари ўртасида кенг оммалашган бўлиб, хусусан юртимиз ҳудудида ХI асрдан буён мавжуд. Бу ҳақда Фирдавсийнинг «Шоҳнома» асарида қимматли маълумотлар бор. Жумладан, Сиёвуш билан Афросиёб ўрталарида чавгон ўйини ўтказилгани ҳикоя қилинади.

Буюк саркарда Заҳириддин Муҳаммад Бобур Ҳиндистонда бу ўйиннинг юксак даражада ривожланишига сабабчи бўлди. Натижада спортнинг бу тури у ердан Буюк Британияга кўчди, кейинчалик эса Европа ва Америка қитъаларидаги мамлакатларга тарқалди, ҳаттоки олимпиада ўйинлари дастурига ҳам киритилди.

Маълумотларга кўра 1850 йилда Ҳиндистонда хизмат қилаётган инглиз отлиқ аскарлари чавгон ўйинига қизиқиб қолишган ва дастлабки мусобақаларни ўтказишган. 1871 йилда Буюк Британияда чавгон (поло) мусобақаси ташкил қилинган.

Шу тариқа чавгон олдин Европа, кейин Америка давлатларига тарқалган.

Чавгон 1900, 1904, 1920, 1924 вa 1936 йилларда бўлган олимпиада ўйинлари дастуридан ҳам жой олган. Замонавий чавгон ўйини ҳозирда поло деб аталади.

Ўзбекистонда ҳам мазкур спорт турини кенг ривожлантириш, халқаро мусобақаларда юртимиз шарафини муносиб ҳимоя қилиш мақсадида жорий йилнинг бошида Ўзбекистон Поло федерацияси давлат рўйхатидан ўтказилган эди.

Бугун пойтахтимиздаги “Universal jumping club” мажмуасида поло спорти бўйича илк мусобақа ташкил этилди.

Тантанали очилиш маросимидан сўнг майдонга «Темурийлар» ва «Бобурийлар» жамоалари кириб келди.

Қизғин ва ҳаяжонга бой бўлган баҳслар якунида ғолиб жамоа номи маълум маълум бўлди.

Андижонлик чавондондозлардан иборат Бобурийлар жамоаси қашқадарёлик рақиблари Темурийларни 6-5 ҳисобида мағлуб этишди.