Қаршидаги мактаб - интернатида ўқитувчи ва мураббийлар эъзозланди

Хусусан, кеча 30 сентябрь куни Қашқадарё вилоят Туризм ва спорт бош бошқармаси тасарруфидаги Қарши шаҳар олимпия ва миллий спорт турлари бўйича давлат ихтисослаштирилган мактаб – интернатида ҳам устоз ва мураббийлар байрамига бағишланган маънавий-маърифий тадбир ташкил этилди. Мазкур байрам тадбирида кўп йилдан буён самарали ва фидокорона меҳнат қилиб келаётган ўқитувчи-мураббийлар мактаб – интернети раҳбарияти томонидан ташаккурнома ва эсдалик совғалари билан мукофотланишди. Шунингдек, ушбу мактаб-интернатининг малакали, фидиойи ва жонкуяр тарих фани ўқитувчиси  Венера Муқимовага байрам муносабати билан Ўзбекистон Республикаси бош вазир ўринбосари, Туризм ва спорт вазири Азиз Абдуҳакимов томонидан имзоланган ташаккурнома ҳам тантанали тарзда топширилди.

Тадбирда сўз олган мактаб-интернати директори Яхё Турдимуродов спорт - таълим масканида фаолият олиб бораётган барча ўқитувчи ва тренерларни ушбу қутлуғ сана билан самимий табриклаб, уларга мустаҳкам соғлиқ, машаққатли ва шарафли меҳнат фаолиятида зафарлар тилади.

Байрам тадбирида мактаб-интернатининг спортчи-ўқувчилари томонидан тайёрланган бадиий саҳна кўринишлари  йиғилганларга хуш кайфият бағишлади.

Илҳом РАҲМОНОВ тайёрлади