Қашқадарё вилояти спорти бошлиғи рекорд ўрнатди

Қашқадарё вилоят ҳокимлиги, вилоят жисмоний тарбия ва спорт бошқармаси ҳамда бир қатор ташкилотлар ҳамкорлигида ўтказилган мусобақада дастлаб, марафон югуришида вилоятдаги умумтаълим мактаблари ўқувчилари, олий ўқув юрти талабалари, ҳарбий хизматчилар, ташкилот ва корхоналарнинг ишчи ходимларидан жами икки минга яқин иштирокчилар белгиланган масофани босиб ўтишди. 

Тош кўтариш баҳслари эса ўзига хос спорт байрамига айланиб кетди. Бир-биридан кучлилар ўз маҳоратини амалда номоён эта бошлашди. Мусобақа шартига кўра, иккита 16 кг тошни икки қўлда бирданига ким кўп кўтара олиш эди. Бунда спортчилар, мураббийлар ҳамда ҳарбий хизматчилар ўзларини синовдан ўтказа бошлашди. 

Кимдир ўттиз беш маротаба, кимдир йигирма, яна кимдир ўттиз марта кўтара олди. Энг кўп кўтарган эса қирқтага етказди. Полвонларнинг ҳаракатларини кузатиб турган Қашқадарё вилоят жисмоний тарбия ва спорт бошқармаси бошлиғи Сирожиддин Одилов ҳам мусобақага қўшилди. У бошқаларга ўрнак бўларли даражада - 16 кг тошни иккала қўлда 61 маротаба кўтариб, мусобақа рекордини ўрнатди ҳамда биринчи ўрин ғолиби бўлди.

Мусобақа сўнгида ғолиб ва совриндорлар Қашқадарё вилоят ҳокимлиги, Қашқадарё вилоят жисмоний тарбия ва спорт бошқармаси томонидан муносиб тақдирланди.

Акбар РАҲМОНОВ тайёрлади