Қашқадарёда китоб совғаси

Хабарингиз бор, жорий йилнинг 19 март куни Президентимиз Шавкат Мирзиёев раислигида бўлиб ўтган видеоселектор йиғилишида ёшларга эътиборни кучайтириш, ёш авлодни маданият ва санъат, жисмоний тарбия ва спортга кенг жалб этиш масалалари доирасида ёшларимиз орасида китобхонликни тарғиб қилишга ҳам алоҳида эътибор қаратиш, ёшлар маънавиятини юксалтириш, уларнинг бўш вақтини мазмунли ташкил этиш бўйича муҳим вазифалар белгилаб берган эди.  

Давлатимиз раҳбарининг ташаббуси ва таклифи билан мамлакатимизда китобхонликка бўлган қизиқиш янада ошаётгани ёшларимизнинг маънавиятига, дунё қараши шаклланашига, одоб-ахлоқига ижобий таъсир кўрсатаётгани айни ҳақиқат.

Ушбу ташаббус боис, юртимиз бўйлаб барча даражадаги раҳбарлар, зиёлилар, ишчи-ходимлар томонидан ўзлари ўқиган умумий ўрта таълим мактабларига китоблар  совға қилиш жараёнларини бошлаб юборишди. Қувонарлиси, мазкур хайрли ташаббус ҳали ҳамон давом этмоқда.

Хусусан, 20 декабрь куни Қашқадарё вилоят болалар-ўсмирлар футбол академияси директори, “Ўзбекистонда хизмат кўрсатган ёшлар мураббийи” унвони соҳиби Нурали Султонов ҳам ўзи ўқиган Косон тумани Халқ таълими бўлимига қарашли 9 – умумий ўрта таълим мактабига ўзбек ва жаҳон адабиётининг нодир дурдоналаридан иборат китоблар жамланмасини совға қилди. Шунингдек, Ўзбекистон Республикаси Президентининг 2019 йил 4 декабрь куни имзоланган “Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида”ги фармонида белгилаб берилган вазифалар ижросини таъминлаш мақсадида  шу куни мазкур мактабда китоблар совға қилиш ташаббуси  доирасида мактабда болалар футболини ривожлантиришга ҳисса қўшиш мақсадида Нурали Султонов  футбол тўплари ва спорт кийимларини ҳам  совға сифатида улашди. Совғалар топшириш тадбирида  футбол академиянинг директори Н. Султонов билан бирга футбол академиянинг спорт ишлари бўйича директор ўринбосари Насим Шойимов, маънавият-маърифат ишлари бўйича директор ўринбосари Шавкат Рўзиев,тажрибали мураббийи  Рустам Тоғаевлар ҳам иштирок этиб, ўқувчиларга китобнинг инсон тафаккури кенгайишдаги  ўрни, жисмоний тарбия ва спортга, футболга ошно бўлиш хусусида ҳаётий тажрибалари билан ўртоқлашди.  Мактаб маъмурияти ва ўқувчилари ушбу ташаббусдан беҳад мамнун бўлишиб, ўз ташаккурларини изҳор этишди. 

Илҳом РАҲМОНОВ тайёрлади