Qatar Masters. Нодирбек Абдусатторов кучли учликда якунлади, Абдумалик Топ-8`да

Мукофот жамғармаси 94 200 АҚШ долларини ташкил қилувчи Qatar Masters турнирида жами 53 нафар ўзбекистонлик шахматчи А ва В гуруҳида баҳс олиб борди. Кучлилар жам бўлган Open турнирида 15 нафар шахматчимиз совринли ўринлар учун курашди. Улар орасида энг яхши натижага Нодирбек Абдусатторов (2777) эришди. 

Турнирда иккинчи рақам остида таснифланган Абдусатторов сўнгги турда ҳиндистонлик гроссмейстер Леон Луке Мендонса (2642)ни мағлубиятга учратди. Тўққиз имкониятдан 7 очко жамғарган Нодирбек қўшимча кўрсаткичларга кўра турнирда совринли учинчи ўринни эгаллади. Турнирнинг биринчи тартиб рақамли шахматчиси Аржун Эргаиси (Ҳиндистон, 2801) ҳамюртимиз сингари 7 очко билан 2-ўринга эга чиқди. Агар Абдусатторов илк турда рейтинги анча паст шахматчига ютқазиб қўймаганида, чемпионга ҳам айланиши мумкин эди. 

Шахматчиларимиз орасида иккинчи энг яхши натижани Абдумалик Абдусалимов (2536) қайд этди. Ёш гроссмейстеримиз 6 очко билан 8-поғонадан жой олди. Еттинчи ўринни эгаллаган ҳиндистонлик Идани Пуя (2603) ҳам Абдумалик сингари 6 очко тўплади. Олти очкога эга Нодирбек Якуббоев (2668) қўшимча кўрсаткичларга кўра 18-ўрин билан кифояланди. 

Qatar Masters 2024 чемпионлиги россиялик Андрей Есипенкога насиб этди. FIDE байроғи остида ўйнаган Есипенко 7,5 очко жамғаришга муваффақ бўлди. Чемпион 25 000, Эргаиси 15 000, Абдусатторов эса 10 000 АҚШ доллари миқдоридаги мукофот пулини қўлга киритди.    

Қолган шахматчиларимизга тўхталадиган бўлсак, Муҳиддин Мадаминов қўшимча кўрсаткичларга кўра 22, Шамсиддин Воҳидов 23, Ортиқ Ниғматов 30, Асроржон Омонов 34 (уччала шахматчимиз ҳам 5,5 очкодан жамғарган), Муҳаммадали Абдураҳмонов 47, Ҳумоюн Бегмуратов 56 (иккаласи ҳам 5 очкодан), Саидакбар Сайдалиев 73, Муҳаммадзоҳид Суяров 75, Алмас Раҳматуллаев 86 (уччаласи ҳам 4,5 очкодан), Афруза Ҳамдамова 90, Баҳром Баҳриллаев 94 (иккаласи ҳам 4 очкодан), Нилуфар Якуббоева эса охирги ўринни эгаллади.