Қиличбозларимиз FIE томонидан тақдирланишди

Маълумки, мамлакатимизда давлатимиз раҳбари ташаббуслари билан барча спорт турлари қатори навқирон авлодни спортга кенг жалб этиш борасида самарали ишлар амалга оширилмоқда.

Хусусан, Ўзбекистон қиличбозлик федерацияси томонидан қиличбозлик спорт турини ривожлантириш ва оммалаштириш борасида мақсадли ишлар олиб борилмоқда.

Таъкидлаш жоизки, федерация раҳбарияти, Ўзбекистон Республикаси Ёшлар сиёсати ва спорт вазирлиги, Ўзбекистон МОҚ кўмагида қиличбоз-спортчиларимизнинг ўқув-машғулот йиғинлари (шу жумладан хорижий давлатларда), шунингдек нуфузли халқаро мусобақаларда тизимли равишда иштирок этиши учуни барча зарур шарт-шароит яратилган. 

Қиличбозларимиз Осиё ўйинлари, Жаҳон ҳамда Осиё чемпионати ва кубоги каби халқаро турнирларда эришаётган юксак спорт ютуқлари бунга яққол мисол бўла олади.

25 ноябрь куни Мисрнинг Шарм Эл-Шейҳ шаҳрида бўлиб ўтган FIE Конгрессида Ўзбекистон қиличбозлик  федерациясига “2022/2023-йилларда эркаклар сабляси бўйича дунёнинг энг яхши ёшлар жамоаси” мукофоти топширилди.

Ўзбекистон қиличбозлик федерацияси матбуот хизмати