Қирғизистондаги фожеали ҳалокат ортидан Ғалаба чўққисига чиқиш учун алпинистлар рухсатнома олиши талаб этилмоқда

Мазкур қарор республика Туризм давлат агентлиги томонидан 2025 йил август ойида россиялик альпинист Наталья Наговицинанинг фожиали ҳалокати ортидан қабул қилинди.

«Ғалаба чўққисига чиқиш учун пермит тизими жорий этилди», — дея маълум қилди республика Туризм давлат агентлиги вакили. Унинг сўзларига кўра, энди альпинистлар чўққига чиқиш ёки маршрутга йўл олишдан олдин расмий рухсатномани олишлари шарт бўлади. Жорий йилда Қирғизистонда ҳали бирорта ҳам спортчи Ғалаба чўққисига йўл олмаган. Агентлик вакили яқин вақт ичида тегишли тайёргарликдан ўтган ва катта тажрибага эга бўлган альпинистларга тахминан йигирмата рухсатнома бериш режалаштирилаётганини ҳам билдирди.

Эслатиб ўтамиз, 2025 йил 12 август куни 47 ёшли россиялик Наталья Наговицина яна уч нафар альпинист — россиялик Роман Мокринский, германиялик Гюнтер Зигмунд ва италиялик Лука Синигалья билан бирга 7439 метр баландликдаги Ғалаба чўққисига кўтарилган. Қайтиш вақтида, 7200 метр баландликда Наговицина қиррадан сирпаниб кетиб, оёғидан жароҳат олган. Тахминларга кўра, унинг оёғи синган. Ҳамроҳи Роман Мокринский унга биринчи тиббий ёрдам кўрсатиб, чодир қолдирган ва ёрдам чақириш учун пастга тушган. 13 август куни Лука Синигалья ва Гюнтер Зигмунд Наговицина олдига қайтиб, унга ухлаш қопи, газ ўчоғи ва озиқ-овқат олиб келишган. Бироқ улар кучсизланиш ва ўта оғир об-ҳаво шароити туфайли уни эвакуация қила олмаган. Кейинчалик италиялик альпинист Лука Синигалья мия шиши оқибатида вафот этган.

16 август куни Қирғизистон Мудофаа вазирлиги Наговицинани вертолёт орқали эвакуация қилишга уринган. Аммо ноқулай об-ҳаво сабабли вертолёт белгиланган нуқтага етиб бора олмаган ва оғир қўнишга мажбур бўлган. Оқибатда экипаж аъзолари жароҳат олган. Кейинги эвакуация уринишлари ҳам муваффақиятсиз якунланган.
27 август куни дрон Наговицина бўлиши тахмин қилинган жойда ҳаёт аломатларини аниқламаган ва шундан сўнг Қирғизистон Фавқулодда вазиятлар вазирлиги уни бедарак йўқолган деб эълон қилган. 2026 йил 5 август ҳолатига кўра, унинг жасади ҳали ҳам тоғдан эвакуация қилинмаган.