Қишда Ўзбекистонга келган энг қиммат легионерлар

Клубларимиз ўз таркибига кўплаб легионерларни жалб қилишгани ҳеч кимга сир эмас. Кўплаб хорижлик футболчиларни исм фамилиясини биринчи марта эшитдик. Уларнинг қандай савияда эканини мавсум кўрсатиб беради. Биз Transfermarkt порталига кўра, айни пайтда трансфер нархи энг қиммат бўлган 13 нафар футболчини кўриб чиқишга қарор қилдик.

400 000 евро - Сальвадор Санчес (Аргентина/"Динамо")
400 000 - Катулонди Кати (Конго ДР/"Навбаҳор")
400 000 - Александре Андроникашвили (Грузия/"Андижон")
450 000 - Пётр Пажишек (Польша/"Пахтакор")
500 000 - Николай Иванов (Беларусь/"Локомотив")
500 000 - Кингсли Сарфо (Гана/"Динамо")
500 000 - Алекс Фернандес (Бразилия/"Навбаҳор")
500 000 - Мауро Брасил (Уругвай/"Динамо")
550 000 - Стипе Перица (Хорватия/"Нефтчи")
700 000 - Ваня Илич (Сербия/"Навбаҳор")
700 000 - Йован Нишич (Сербия/"Локомотив")
700 000 - Неманья Чаласан (Сербия/"Андижон")
800 000 - Анри Чичинадзе (Грузия/"Навбаҳор")

"Навбаҳор" нархи 800 минг евро бўлган грузиялик марказий ҳимоячи Анри Чичинадзени ўз сафига қўшиб олди.

Бу рўйхатда энг қиммат уч нафар футболчи ҳам Сербия мамлакатидан эканига эътибор қилинг. "Андижон"га келган Чаласан марказий ҳимоячи, терма жамоа собиқ футболчиси. Фаолияти давомида Португалия клубларида ҳам ўйнаган. Сўнгги клуби Қозоғистоннинг "Елимай" жамоаси бўлди. 

"Навбаҳор"га ўтган Илич эса "лочинлар" уни бекорга "Раднички Ниш" клубидан сотиб олмаганини исботлаши керак бўлади.

"Локомотив"га ўтган ярим ҳимоячи Нишич ҳам терма жамоада кам бўлса ҳам майдонга тушишга улгурган ва ўтган икки мавсум Илич билан битта клубда ўйнаган.

Ўзбекистоннинг амалдаги чемпиони Фарғонанинг "Нефтчи" клуби "Удинезе", "Уотфорд", "НАК Бреда", "Стандард" каби жамоаларда тўп тепган хорватиялик ҳужумчи Стипе Перицани ўз сафига қўшиб олди.

"Динамо" нархи 500 минг бўлган икки легионерни ўз сафига қўшиб олди. Ҳимоячи Мауро Брасил Ўзбекистон Суперлигасида ўйнайдиган тарихдаги биринчи уругвайлик футболчи бўлади. Ганалик ярим ҳимоячи Кингсли Сарфо эса "Нефтчи"га ўтиб кетган Ратиньонинг ўрнини босиш учун олинди.

"Навбаҳор" "Балтика"дан трансфер нархи 500 минг бўлган бразилиялик вингер Алекс Фернандесни ижарага олди.

"Локомотив" ўз таркибига қўшиб олган марказий ярим ҳимоячи Николай Иванов ўтган мавсум Беларусда 7 та гол урди ва 7 та ассист берди.

Нархи 450 минг евро бўлган полшалик ҳужумчи Пётр Пажишек "Пахтакор"да Игор Сергеевнинг ўрнига олиб келинди. У фаолияти давомида "Чарлтон", "Сент Труйден", "Зволле", "Фрозиноне", "Леганес" каби клубларда тўп тепган.

Бундан ташқари "Динамо" аргентиналик ҳимоячи Салвадор Санчес, "Навбаҳор" конголик ҳужумчи Катулонди Кати ва "Андижон" грузиялик ярим ҳимоячи Александре Андроникашвили билан шартнома тузди. Учала футболчининг трансфер нархи 400 минг еврога тенг.