Қизларимиздан Умида Омонова кучли бешликда!

Бугун рапид йўналиши бўйича ўтказилган 4 та турнинг 3 тасида ғалаба, 1 тасида дуранг қайд этган Умида Омонова ўзбекистонлик шахматчилар орасида куннинг энг яхши натижасини кўрсатди. Яқиндагина ёшлар ўртасида блиц йўналишида Осиё чемпиони бўлган Омонова 3,5 очко билан 5-ўринни эгаллаган ҳолда пешқадамдан ярим очкога ортда қолмоқда. 

Ҳиндистонлик Ҳампи Конеру, украиналик Анна Музичук, россиялик Валентина Гунина, Катерина Лагно сингари жаҳон чемпионлари 4 имкониятдан 3 очко жамғаришди. Ҳиндистонлик яна бир жаҳон чемпиони Ҳарика Дроновалли эса 2 очко билан 48-поғонада бормоқда. Яқиндагина 14 ёшгача шахматчилар орасида жаҳон чемпиони бўлган Афруза Ҳамдамова 2 очко билан 49-ўринни эгаллаб турибди. 

АҚШ шарафини ҳимоя қилаётган ҳамюртимиз Гулруҳбегим Тоҳиржонова 3,5 очко билан 4-ўринга жойлашди. Уч опа-сингил гроссмейстерларнинг кенжаси ҳисобланган Гулруҳбегим 3 ғалаба ва 1 дуранг қайд этди. Болгариялик Нургюл Салимова ва хитойлик Жу Жинер юз фоизлик натижа - 4 очкодан жамғариб, турнир жадвалида қўшҳокимлик қилишяпти. Эртага рапид бўйича баҳслар давом эттирилади. 

Суратда Гулруҳбегим Тоҳиржонова (АҚШ)