"Qonaev Cup 2025" турнири якунланди. Шахматчиларимизнинг ўринлари қандай бўлди?

Учта гуруҳда ташкил этилган мусобақада дунёнинг 19 давлатидан жами 268 нафар шахматчи совринли ўринлар учун баҳс олиб борди. Ушбу турнирда Ўзбекистон шарафини 5 нафар шахматчимиз ҳимоя қилди ва афсуски, улардан ҳеч бири совринли ўринларни эгаллай олмади.   

Мукофот жамғармаси 78 000 долларни ташкил этган "Masters" гуруҳида Муҳаммадзоҳид Суяров (2488) ва Ҳумоюн Бегмуратов (2466), 15 000 доллар соврин пулига эга "Challengers" гуруҳида эса гроссмейстеримиз Алексей Барсов (2323), шунингдек Миразиз Матякубов (2260) ҳамда Азамат Дауримбетов (2199) ўз омадини синаб кўрди. 

Сўнгги 9-турда Муҳаммадзоҳид Суяров қора доналарда FIDE байроғи остида ўйнаган гроссмейстер Никита Афанасьев (2499)га имкониятни бой бериб қўйди. Бу унинг кетма-кет иккинчи мағлубият бўлди. Ҳумоюн Бегмуратов эса сўнгги турда яна дуранг ўйнади. Қора доналарда ҳаракат қилган ёш шахматчимиз қозоғистонлик Мирас Ассилов билан муросага келди. 

Якунда Муҳаммадзоҳид Суяров 4,5 очко билан қўшимча кўрсаткичларга кўра роппа-роса 30-ўринни эгаллади. Тўққиз имкониятдан 4 очко жамғарган Ҳумоюн Бегмуратов эса 46-ўрин билан чекланди. "Masters" гуруҳи чемпионлиги 6,5 очко жамғарган ҳиндистонлик гроссмейстер Адитя Миттал (2660)га насиб этди. У чемпионлик билан бирга 18 000 АҚШ доллари миқдоридаги мукофот пулини ҳам қўлга киритди. Адитя сингари 6,5 очкога эга FIDE байроғи остида ўйнаган Алексей Гребнев (2595) иккинчи ўринни эгаллади. Бир йўла 10 нафар иштирокчи 6 очко тўплади, улар орасида энг яхши кўрсаткичга эга мисрлик Амин Бассем (2633) кучли учликка якун ясаб берди.   

"Мастерс" гуруҳига қараганда "Challengers"да қатнашган шахматчиларимизнинг натижалари яхшироқ бўлди. Тажрибали гроссмейстеримиз Алексей Барсов сўнгги 9-турда қора доналарда ўйнаганига қарамай, қозоғистонлик Алибек Игамбергеновни мағлубиятга учратди. Миразиз Матякубов оқ доналарда мўғулистонлик Нямдаваа Энхболордан устун келди. Азамат Дауримбетов эса афсуски, муҳим паллада россиялик Константин Корниенкога оқ доналарда ўйнаган бўлишига қарамай, имкониятни бой берди. Ғалаба қозонганида, аниқ кучли учликда бўлар эди. 

Шу тариқа, Алексей Барсов 9 имкониятдан 6,5 очко жамғариб, қўшимча кўрсаткичларга кўра 7-ўринни эгаллади. Азамат Дауримбетов 6 очко билан 10-ўриндан жой олди. Миразиз Матякубов эса 5,5 очко билан 16-поғонага жойлашди. Бу гуруҳда ғолиблик қозоғистонлик Абилмансур Аблихайирга насиб этди. У сингари 7 тадан очко тўплаган Константин Корниенко ва яна бир мезбонлар вакили  Бахтияр Асқаров кучли учликни якунлаб берди. Агар Дауримбетов Корниенкони ютганида, айнан ҳамюртимиз 2-ўринга сазовор бўларди.