Қойил! Ҳумоюн Султонов Australian Open турнирини ғалаба билан бошлади

Қувонарлиси, ҳамюртимиз Ҳумоюн Султонов Австралия Очиқ чемпионатидаги иштирокини ғалаба билан бошлаб олди. Мамлакатнинг биринчи ракеткасига саралаш босқичининг илк даврасида колумбиялик Даниэль Элахи Галан рақиблик қилди.

Ҳозиргина якунига етган ва 2 соату 39 дақиқа давом этган учрашувда наманганлик 26 ёшли теннисчимиз 28 яшар Галанни 6/3, 6/7(2), 7/5 ҳисобларида мағлубиятга учратди. Бу теннисчиларнинг ўзаро ўтказган иккинчи учрашуви бўлди. Улар ўртасидаги илк баҳс 8 йил олдин, 2016 йили Италиянинг Леччо шаҳрида ўтказилган ITF турнири доирасида ташкил этилганди. Ўшанда Султонов 3/6, 7/6, 6/4 ҳисобида зафар қучган эди. 

Таққослаш учун, Ҳумоюн Султонов айни пайтда ATP рейтингида 223, Галан эса 126-ўринни банд этиб турибди. Даниэль ҳам ўз юрти Колумбиянинг биринчи рақамли теннисчиси ҳисобланади. Галан саралаш турнирида 20-рақам остида таснифланган эди.