Қойил! Жаҳон чемпионатида қатнашаётган ягона аёл шахматчимиз амалдаги жаҳон чемпионини мағлуб этди

Аёллар ўртасидаги дунё биринчилигида ягона вакиламиз Афруза Ҳамдамова (2188) юртимиз шарафини ҳимоя қилмоқда. Ёшлар ўртасида икки карра жаҳон чемпиони бўлган Афруза 8 имкониятдан 5,5 очко жамғариб, қўшимча кўрсаткичларга кўра 15-ўринни эгаллаб турибди. Тўққизинчи поғонадаги хитойлик гроссмейстер Тан Жонг Йи (2502) ҳисобида ғам 5,5 очко бор.  

Ҳамдамова кеча тунда ўтказилган 4 та турда 2 ғалаба, 1 дуранг ва 1 мағлубият қайд этди. Афруза 7-турда қора доналарда ўйнаганига қарамай, икки карра жаҳон чемпиони, блиц йўналишида амалдаги жаҳон чемпиони россиялик Валентина Гунина (FIDE, 2388)ни мағлуб этишни уддалади. У 8-турда қозоғистонлик гроссмейстер, блиц йўналишида икки карра жаҳон чемпиони Бибисара Ассаубаева (2444) билан дуранг ўйнади. Бешинчи турда руминиялик Ирина Булмага (2378)дан устун келди.  

Турнир жадвалида 8 имкониятдан 6,5 очко жамғарган хитойлик Жу Венжун (2536) қўшимча кўрсаткичларга кўра пешқадамлик қилмоқда. Ҳиндистонликлар Ҳарика Дроновалли (2416) ва Ҳампи Конеру (2431) ҳисобида ҳам 6,5 очко бор. Катерина Лагно (FIDE, 2433), Йип Карисса (АҚШ, 2389), Александра Костенюк (Швейцария, 2486), Элизабет Паетз (Германия, 2406) ва Ставрула Тсолакидоу (Греция, 2381) 6 очкодан бор. 

АҚШ шарафини ҳимоя қилаётган Гулруҳбегим Тоҳиржонова 8 имкониятдан 4 очко жамғариб, қўшимча кўрсаткичларга кўра 33-поғонадан 63-ўринга тушиб кетди. У 3 ғалаба, 2 дуранг ва 3 та мағлубият қайд этган.