Қозоғистон терма жамоасининг етакчи боксчиларидан бири кутилмаганда фаолиятини якунлади

Бу ҳақда Sports.kz журналист Аслан Каженовга таяниб хабар берди.

"Оғир вазнда жаҳон чемпиони, миллий терма жамоа аъзоси, Манғистав вилоятида туғилган Бекзат Нурдаулетов спортчилик фаолиятини якунлади. Айтиш жоизки, у ёшлар ўртасида жаҳон чемпионати бронза медали соҳиби, катталар ўртасида жаҳон чемпиони ва Токио Олимпиадаси иштирокчисидир.

Шу билан бирга, Бекзат боксдан кетмаяпти. У энди мутахассис сифатида фаолият юритиб, минтақада спорт ривожига ҳисса қўшади", — деб хабар берди журналист Instagram саҳифасида.

Маълумот учун, Нурдаулетов фаолияти давомида ўзбекистонлик боксчиларга қарши кўп маротаба тўқнаш келган. У Мадияр Саидраҳимов, Дилшодбек Рўзметов, Козимбек Мардонов, Жасурбек Йўлдошев, Акмалжон Исроилов каби вакилларимизга қарши жангларда ғалабага эришган. Бектемирга Мелиқўзиевга эса мағлуб бўлган.