Қозоғистонлик ҳали мағлуб бўлмаган боксчи расман вақтинчалик чемпионлик жангида иштирок этади

Бутунжаҳон бокс ташкилоти ўрта вазн (72,6 кг) тоифасидаги мексикалик Хайме Мунгиа (39-0, 31 КО) ва қозоғистонлик Жанибек Алимханули (11-0, 7 КО) ўртасидаги вақтинчалик чемпионлик камари учун жангга буйруқ берди.

Томонларга жанг шартларини келишиб олишлари учун 4 мартгача муддат берилди.  Агар шартнома шу вақтгача имзоланмаса, ташкилотчи 200 000 АҚШ доллари миқдоридаги минимал таклиф билан реклама аукционини белгилайди.

Эслатиб ўтамиз, яқин вақтгача -72,6 кг вазн тоифасида WBО чемпионлик камарига америкалик Деметриус Андраде эгалик қилган. У Алимханулига қарши мажбурий ҳимоя жангида иштирок этишни истамади ва битта вазн юқорига кўтарилди. Деметриус у ерда британиялик Зак Паркерга қарши WBО вақтинчалик камари учун жанг қилади.