28 июл 09:58
Янгиликлар

Теннис

Қозоғистонлик теннисчи кетма-кет иккинчи ҳафта ҳам ATP турнири чемпиони бўлди

Австриянинг Китцбюэль шаҳри мезбонлик қилган ATP 250 тоифасига кирувчи турнир Александр Бубликнинг ғалабаси билан якунланди.

Финалга қадар дунёнинг 30-ракеткаси бўлиб турган қозоғистонлик теннисчи ҳал қилувчи финал учрашувида ATP рейтингида роппа-роса 100-поғонадан жой олган франциялик Артур Казони мағлубиятга учратди - 6/4, 6/3. Теннисчиларнинг ўзаро учрашувларидаги ҳисоб йириклашди - 3:0.

Саксон беш дақиқа давом этган баҳсда Бублик 5, Казо 7 та эйс зарбасини амалга оширган. Александр грунт қопламали турнирда кетма-кет иккинчи ҳафта ҳам чемпион бўлди. У ўтган ҳафта Швейцариянинг Гштаад шаҳридаги ATP турнирида ҳам бош совринга эга чиққанди. Бу унинг мавсумдаги учинчи, фаолиятидаги еттинчи чемпионлик соврини бўлди.

Generali Open турниридаги муваффақиятли иштирок Александр Бубликка 250 рейтинг очкоси ҳамда 90 675 евро мукофот пули келтирди.