Қудратилло Липинецнинг фикрига муносабат билдирди

"Жангнинг кўчирилишини чемпиондек қабул қилдим ва мен 10 октябрь куни қилишим керак бўлган ишни 24 октябрь санасида ҳам амалга оширавераман. Руҳан жуда кучлиман ва шу сабабли менда муддатнинг ўзгариши билан ҳеч қандай муаммо йўқ. Тайёргарлик ажойиб тарзда кетмоқда ва мен жангга 100% тайёрман. Мен Жо Гуссен  билан ишладим, Эллис Рашиди ва Роналд Крус каби кучли боксчилар билан спарринглар ўтказдим. 

"Абдуқаҳҳоровнинг ҳаваскор боксда ажойиб карьераси бор, у жуда кўп жанг ўтказган. Рингда жуда тез ҳаракат қилади. Шу билан бирга кучли зарбаси бор. Жисмоний ҳолати ҳам ажойиб. У жангда буларнинг ҳаммасини кўрсатади. Мен у билан масофада жанг қилмоқчиман. Мен яхши жанг кутаяпман. Менда унинг ҳамма ҳаракатлари учун режалар бор, нима қилиб бўлмасин ғалаба қозонаман!", - деганди Липинец.

Биз айни пайтда Малайзияда бўлиб турган Қудратилло билан боғландик ва Липинецнинг фикрига унинг муносабати қандайлигини сўрадик. Абдуқаҳҳоров эса босиқлик билан қисқа ва лўнда жавоб берди:

"Ҳаммасини ринг кўрсатади. Жангдан аввал ҳамма катта гапираверади. Аҳамият бермаймиз!"