Рафаэль Физиев ва Жозе Альдо UFC рейтингида кўтарилди

Қирғизистонлик Рафаэль Физиев якшанба тонгида Янги Зеландия вакили Брэд Ридделлни нокаутга учратган эди. Ушбу ғалаба эвазига Физиев янгиланган рейтингда 14-поғонадан 11-ўринга кўтарилиб олди. Бу билан "Атаман" ТОП-10`га яқинлашиб олди. 

Физиев жойлашган вазнда Чарльз Оливейра амалдаги чемпион, унинг шу ҳафта ўтказиладиган жангдаги рақиби Дастин Порье эса биринчи ўринни эгаллаб турибди. Кучли бешликдан Бенеил Дариуш, Ислам Махачев ва Майкл Ченлдер жой олган. Дариуш ва Махачев ўзаро жангда тўқнаш келишларини ҳам эслатиб ўтиш жоиз бўлса керак.   

UFC on ESPN 31 турнирининг яна бир иштирокчиси, ярим енгил вазнда собиқ UFC чемпиони Жозе Альдо ҳам рейтингдаги ўз ўрнини бирмунча яхшилаб олди. У якшанба тонгида Роб Фонтни очколар ҳисобига кўра таслим этганди. Бразилиялик афсонавий жангчи 5-поғонадан 3-ўринга кўтарилди. Альдодан олдинги ўринларни Ти Жей Диллашоу ва Петр Ян банд этишган.