Рамазон Темиров октагонга чиқадиган UFC турнирининг асосий жанги маълум

Вазиятга яқин ишончли манбаларнинг хабар беришича, UFC Fight Night турнирининг асосий жанги ярим оғир вазн тоифасида собиқ UFC чемпиони россиялик Магомед Анкалаев иштирокида ўтказилади. Унга шу куни чемпионлик камари учун собиқ даъвогар америкалик Халил Раунтри рақиблик қилади.

Ўтган йилнинг март ойида Магомед Анкалаев ҳакамларнинг якдил қарори билан Алекс Перейрани мағлуб этиб, дивизионнинг янги чемпионига айланганди. Аммо октябрь ойида ўтган реванш жангида россиялик биринчи раунддаёқ бразилиялик рақибига техник нокаут билан ютқазиб, чемпионликни бой берди.

Халил Раунтри эса 2024 йил октябрь ойида Перейрадан чемпионлик камарини тортиб олишга уриниб кўрган, лекин муваффақиятсизликка учраганди. Ўшанда у тўртинчи раундда Поатанга техник нокаут билан ютқазиб қўйганди. Шундан сўнг у яна иккита жанг ўтказиб, Жамал Хилл устидан ҳакамларнинг якдил қарори билан ғалаба қозонди, Иржи Прохазкага эса учинчи раундда нокаут билан ютқазди.

Айни пайтда Магомед Анкалаев ва Халил Раунтри ташкилотнинг ярим оғир вазн тоифаси рейтингида мос равишда биринчи ва бешинчи ўринларни эгаллаб турибди.

Хабарингиз бор, Абу-Даби турнирида ҳамюртимиз Рамазон Темиров UFC рейтингида ўнинчи ўринни эгаллаб турган австралиялик Стив Эрцегга қарши жанг ўтказади.