Рамазон Темиров ўрнига Муҳаммад Мокаевга янги рақиб берилди + ПОСТЕР

Аввал хабар берганимиздек, турнир доирасида ҳамюртимиз Рамазон Темиров британиялик собиқ UFC жангчиси Муҳаммад Мокаевга қарши баҳс олиб бориши керак эди. Аммо Рамазон учун 24 октябрь кунига расман жанг белгилангани боис, Мокаев рақибсиз қолганди. 

Ташкилот Муҳаммад Мокаевга янги рақиб берди. Арманистонлик аралаш яккакураш устаси Морис Болеян "Ora Arena"да ўтадиган турнирда британиялик рақиби билан ҳисоб-китоб қиладиган бўлди. Ушбу беллашув Grand Title Battle Match номи остида 60 кг гача бўлган вазн тоифасида жанговар грепплинг қоидалари асосида ўтказилади. 

Тадбирнинг тарғибот материалларида жанг айнан жанговар грепплинг форматида ўтиши алоҳида таъкидланган. Ташкилотчилар, шунингдек, ACBJJ 22 турнирига чипталар сотуви лиганинг расмий чипталар хизмати орқали бошланганини ҳам маълум қилишди.

Маълумот учун, Морис Болеян профессионал ММАда 6 ғалаба ва 1 мағлубият қайд этган. Ягона мағлубиятини шу йил охирги жангида қабул қилиб олган. У 31 январь куни UAE Warriors 67 турнири доирасида Рони Энрике Пинтога ҳакамларнинг айри қарори билан ютқазиб қўйганди.