Расман: АҚШ ЖЧ иштирокчиси ҳисобланган давлат ишқибозларини мамлакатга киритмайди

Гаити терма жамоаси 52 йил ўтиб, илк бор (тарихида иккинчи марта) мусобақанинг финал босқичига йўлланмани қўлга киритганди. Бироқ ушбу терма жамоа мухлислари АҚШга киришда муаммоларга дуч келадиган кўринади. 

Гап шундаки, шу йилнинг июнь ойида Дональд Трамп 12 давлат фуқароларига мамлакатга киришни тақиқловчи ҳужжатга имзо чекканди. Бундай ҳаракат миллий хавфсизликни таъминлаш учун зарур чора-тадбирлар эканлиги таъкидланганди. Рўйхатдаги давлатлар орасида Гаити давлати ҳам бор.

Энди эса барчаси расман ўз тасдиғини топди — президент Дональд Трамп администрацияси қарорга ўзгартириш киритмаслиги ва у ёки бу давлат учун истисно қилинмаслигини маълум қилди.

Бошқа томондан бу қарор терма жамоа аъзолари ва АҚШда истиқомат қилувчи гаитиликларга таъсир қилмайди. Қўшма штатларда эса гаитиликларнинг каттагина диаспораси бор. Демак, Гаити терма жамоаси мундиалда буткул мухлисларсиз қолиб кетмайди.

Гаити тарихда биринчи ва ҳозирча ягона марта 1974 йилда жаҳон чемпионатида иштирок этган. Гуруҳнинг учала ўйинида ҳам мағлуб бўлган бўлсада, гаитиликлар 2 бор рақиблари дарвозасини ишғол этишни уддалаган.

Хорижий манбалар асосида тайёрланди