Расман. Баҳодир Жалолов навбатдаги жанги санаси ва манзилини тасдиқлади (ПОСТЕР)

Ҳамюртимиз аввал кутилганидек, 5 апрель куни Қозоғистоннинг Астана шаҳрида Top Rank ташкил этадиган бокс оқшомида рингга кўтарилади.

Бокс оқшомида Жалоловга ким рақиблик қилиши ҳақида аниқ маълумотлар мавжуд эмас. Аммо кўпчилик ўша куни Баҳодирнинг қозоғистонлик Иван Дичко билан жанг қилишини тахмин қилмоқда.

Эслатиб ўтиш жоиз, Жалолов 7 февраль куни Канаданинг Монреаль шаҳрида ўтказилган проф бокс оқшоми доирасида франциялик Девид Спилмонт билан жанг қилиши керак эди. Аммо ташкилотчилар Баҳодирнинг юзидаги ҳуснбузар туфайли жангни бекор қилишганди. Шундан кейин Жалолов ҳам, Спилмонт ҳам тез орада бошқа манзилда жанг ўтказишга тайёр эканликларини билдиришганди. 

5 апрель куни "Барыс Арена"да ўтказиладиган турнирнинг марказий жангида ўрта вазн тоифасида IBF ва WBO йўналишлари чемпиони қозоғистонлик Жанибек Алимханули (16-0, 11 KO) келиб чиқиши конголик, ҳозирда Франция шарафини ҳимоя қилаётган Анауэль Нгамиссенге (14-0, 9KO)га қарши рингга кўтарилади.

Шунингдек, Астанадаги турнирда қозоғистонлик ака-ука Маҳмуд ва Торехан Сабирхонлар профессионал боксдаги дебют жангларини ўтказишади. Ҳамюртларимиздан эса Баҳодир Жалоловдан ташқари ярим енгил вазн тоифасида WBA камари учун собиқ даъвогар Отабек Холматов иштирок этади.