Расман! Богдан Гусковнинг собиқ UFC чемпионига қарши жанги тасдиқланди + ПОСТЕР

Аввалроқ, Богданнинг 22 ноябрь куни Қатарда ўтказиладиган турнирда айнан Блаховичга қарши октагонга чиқиши айтилганди. Энди эса Гусков йилнинг сўнгги рақамланган турнирида ярим оғир вазн тоифасида собиқ UFC чемпионига қарши жанг қилади. Эҳтимолий ғалаба уни даъвогарлар сафига яқинлаштиради. 

UFC 323 турнири бизнинг вақт билан 7 декабрь куни тонг саҳарда АҚШнинг Невада штати Лас-Вегас шаҳрида бўлиб ўтади. 33 ёшли аралаш яккакураш устамиз айни пайтда UFC ярим оғир вазн рейтингида 11-ўринни эгаллаб турибди. Польшалик 42 ёшли Ян эса дивизион рейтингида 4-поғонадан жой олган. 

Маълумот учун, Богдан Гусков 26 июль куни Абу-Дабида ўтган UFC on ABC 9 турнирида россиялик Никита Криловни биринчи раунддаёқ техник нокаут эвазига мағлубиятга учратган эди. У дебют жангида Волкан Оздемирга ютқазганидан кейин Зак Пауга, Райан Спэнн, Билли Элекана ва Никита Криловни муддатидан аввал таслим этиб, рейтингда 11-ўринга кўтарилди. 

Ян Блахович эса иккита мағлубиятли серия билан келмоқда. У сўнгги иккита жангида ҳозирги чемпион Алекс Перейра ҳамда Карлос Ульбергга очколар ҳисобига кўра ютқазган.