Расман! Эдди Хирн Энтони Жошуа — Фрэнсис Нганну жангини тасдиқлади

Британиялик таниқли промоутер Эдди Хирн ушбу жангнинг ўтказилишини расман тасдиқлади. 

"Кеча кечқурун музокараларнинг якуний босқичи ўтказилди ва ҳозир бемалол ушбу супержангнинг ўтказилишини расман эълон қилишимиз мумкин. Энтони Жошуа ва Фрэнсис Нганну март ойида Саудия Арабистони пойтахти Ар-Риёд шаҳридаги ажойиб бокс оқшомида тўқнаш келишади. Ушбу турнирга бағишланган илк матбуот анжумани 15 январь куни Лондон шаҳрида бўлиб ўтади. Яқин кунларда шартноманинг тўлиқ деталлари билан танишишингиз мумкин бўлади", – дея ўзининг ижтимоий тармоқдаги саҳифаларида хабар ёзиб қолдирган Хирн.

Эслатиб ўтамиз, Жошуа - Нганну жанги бокс қоидалари асосида ташкил этилади. Фрэнсис 2023 йилнинг октябрь ойида боксда дебют қилган ва амалдаги WBC чемпиони Тайсон Фьюрига очколар ҳисобига кўра ютқазиб қўйганди. Камерунлик аралаш яккакураш устаси номдор рақибини нокдаун ҳолатига ҳам тушириб қўйганди. Лекин якунда ҳакамларнинг айри қарори билан ғалаба Фьюрига тақдим этилган эди.