Расман: IBF Жей Опетайяни чемпионлик камаридан маҳрум қилди

У 8 март куни Дана Уайт Zuffa Boxing шоуси доирасида ўтказилган Брэндон Глэнтонга қарши рухсат этилмаган жангда иштирок этгани учун ташкилотнинг биринчи оғир вазн тоифасидаги чемпионлик камаридан маҳрум этилди.

IBF Опетайянинг Глэнтонга қарши ихтиёрий ҳимоясига қарши санкциясини бекор қилди, чунки уларнинг жангида Zuffa чемпионлик камари ўртага қўйилганди - бу ташкилот IBF томонидан тан олинмаган.

Санкция бекор қилинган вақтда (жангдан 48 соатдан камроқ вақт олдин) Опетайя чемпионлик жангига рухсат бериш учун IBF’га тахминан 80 минг доллар миқдорида бадал тўлаган, бироқ эртаси куни бу пуллар унга қайтарилган.

IBF уни камаридан маҳрум қилмоқчи эканлигидан хабар топган Опетайя Дана Уайтнинг адвокатлари кўмагида IBF`га қарши судга мурожаат қилди, аммо бу ташкилотнинг позициясини ўзгартиришга ёрдам бермади.

Аввалроқ Дана Уайт IBF Опетайя - Глэнтон жангида рамзий эмас, балки ҳақиқий чемпионлик сифатида эълон қилинган Zuffa камари ўйналишини билганини таъкидлаган эди. Бироқ, бу даъво ҳақиқатга тўғри келиши даргумон, чунки Опетайянинг ўзи тан олишича, у IBF камарига жанглар учун амал қиладиган қоидага мувофиқ жанг куни қайта вазн ўлчашдан ўтган, аммо бирлаштирувчи жанглар учун эмас.