Расман. Исроил Мадримовнинг жанги Тошкентда ўтказилади

Аввал хабар берганимиздек, Исроил «Тhe Dream» Мадримовнинг декабрь ойида франциялик Мишель Сорога қарши ўтказиладиган жангига Тошкент шаҳри мезбонлик қилиши мумкин эди. Бу хабар расман ўз тасдиғини топди. Аввалига Исроил, кейин эса таниқли промоутер Эдди Хирн бу маълумотни тасдиқлади.  

Мадримов - Соро жанги ғолиби WBА чемпионлик жангида рингга чиқиш учун расмий даъвогарга айланади. "Мир Бокса" компанияси "Маtchroom Boxing" билан ҳамкорликда ушбу жангни 11 декабрь куни Тошкентда ўтказади. Пойтахтимиздан ташқари жанг мезбонлигига АҚШнинг Лас-Вегас ва Кливленд шаҳарлари ҳам даъвогарлик қилганди. 

Аукцион ғолиби томонидан тақдим этилган мукофот жамғармаси 245 минг долларни ташкил этган. Рейтингнинг биринчи рақамли боксчиси Мишель Соро мукофот пулининг 60 фоизи - 147 минг доллар, рейтингнинг иккинчи рақамли боксчиси Исроил Мадримов эса 40 фоиз - 98 минг долларга эга бўлади.