Расман! Тайсон Фьюри ва Энтони Жошуа ўртасидаги узоқ кутилган жанг ниҳоят эълон қилинди!

Тўқнашув Netflix орқали жонли эфирда намойиш этилади. Жанг расман тасдиқланганини Турки Алалшайх ва Netflix 24 сентябрь куни эълон қилди.

Томонлар бир неча ой давом этган музокаралардан сўнг келишувга эришди. Фьюри жанг қаерда ўтказилишининг аҳамияти йўқлигини билдирган, Жошуа эса учрашув Буюк Британияда бўлишини истаганди.

Натижада жанг Уэльс пойтахти Кардиффдаги Principality Stadium’да ўтказиладиган бўлди. Бу стадионда Жошуа аввал ҳам икки марта жанг қилган. Фьюри эса Уэльсда ҳали рингга чиқмаганди.

«Бу авлоднинг икки энг яхши оғир вазн боксчиси ниҳоят бир рингда учрашади. Бу бокс тарихидаги энг катта жанглардан бири бўлади», — дейди жанг анонсида Турки Алалшайх.

Жошуа профессионал фаолиятида 30 та ғалаба ва 4 та мағлубият қайд этган. Фьюрининг кўрсаткичи эса 36 та ғалаба, 2 та мағлубият, 1 та дурангдан иборат.