Расман: Турки ал аш Шайҳ Теренс Кроуфорд - Сауль Альварес жанги санаси ва манзилини эълон қилди

Кеча Ар-Риёд шаҳрида ўтган ва Сауль Альвареснинг ғалабаси билан якунланган жангдан кейин Турки Ал аш-Шейх рингга чиқиб келди ва ҳар икки боксчи гувоҳлигида ушбу йил жангига қиёсланаётган тўқнашувни расман эълон қилди. 

Иккинчи ўрта вазн тоифасида мутлақ жаҳон чемпионига айланган мексикалик афсона икки вазнда собиқ мутлақ жаҳон чемпиони америкалик Теренс Кроуфордга қарши рингга кўтарилади. Жанг 12 сентябрь куни АҚШнинг Лас-Вегас шаҳридаги "Аллегиант" аренесида ўтказилади. Ушбу жанг иккинчи ўрта вазнда мутлақ жаҳон чемпионлиги учун ташкил этилади. 

Маълумот учун, кеча Альварес Ар-Риёд шаҳрида ўтказилган проф бокс оқшомида кубалик Уильям Скаллни 12 раунд тўлиқ давом этган жангда очколар ҳисобига кўра мағлубиятга учратган ҳамда ўз фаолиятида иккинчи бор иккинчи ўрта вазнда мутлақ жаҳон чемпионига айланганди. Кроуфорд эса сўнгги жангини ўтган йилнинг 3 август куни Лос-Анжелесда ҳамюртимиз Исроил Мадримовга қарши ўтказиб, ҳакамларнинг қарорига кўра ғалаба қозонган эди.