Расмий хабар: Ўзбекистонлик UFC жангчиси таъқиқланган модда қабул қилгани учун икки йилга четлатилди

Ҳамюртимиз Лилия Шакирова UFC промоушенидан икки йилга четлатилди. Бу ҳақида антидопинг ташкилоти USADA расман хабар берди. 

USADA`нинг маълум қилишича, Лилия Шакированинг тест намуналаридан мельдоний моддаси топилган. Ушбу модда ҳар доим USADA ташкилотининг таъқиқланган моддалар рўйхатида бўлган. 

Баёнотда маълум қилинишича, ҳар бир жангчи допинг тести топшириш пайтида, сўнгги 12 ой давомида истеъмол қилган таъқиқланган моддаларини алоҳида декларация тўлдирган ҳолда маълум қилиши лозим. Агарда унинг қон таркибидан ушбу декларацияда кўрсатилган моддалар топилган тақдирда ҳам жангчи айбдор деб ҳисобланмайди. Шунчаки, модданинг турига қараб, у танадан чиқиб кетмагунча жангларга қўйилмайди ва қайтадан тест топширади. 

Лилия Шакирова эса, юқорида таъкидланган декларацияни тўлдириш чоғида мельдоний моддаси ҳақида бирор маълумот кўрсатмаган. Бу эса жангчини икки йилга четлатилишига сабаб бўлган.

Таъқиқланган модда Лилия Шакирова 2020 йилнинг 5-декабрида топширган намуналаридан топилган. Дисквалификация муддати айнан ушбу санадан бошлаб ҳисобланади ва икки йил амалда бўлади.

Эслатиб ўтамиз, Лилия Шакирова 2020 йилнинг октябрь ойида UFC`да дебют жангини ўтказганди. UFC 257 доирасида ўтказилган ўша жангда ҳамюртимиз Лаурен Мёрфига мағлуб бўлганди.