Рауф Инилеев: "Мундиал арафасида ҳеч ким жароҳат олмаслиги муҳим, чунки захирамизда бошқа Шомуродов, Юсупов ва Ҳусанов йўқ!"

"Охирги йилларда барча терма жамоаларимиз юқори даражада ўйнамоқда. Энг муҳими — шу барқарорликни йўқотмаслик. Агар мана шу тизимни сақлаб қолсак, барча турнирларда муносиб натижаларга эришишимиз мумкин.

Жаҳон чемпионатига ҳақли равишда чиқдик ва бу — катта натижа. Албатта, ҳамма кейинги босқичга чиқишимизни истайди, бу эса табиий ҳол, чунки имкониятларимиз бор. Гуруҳимизда жуда кучли ёки жуда кучсиз рақиблар йўқ.

Энг асосийси — мундиал арафасида бирор футболчимиз жароҳат олмаслиги керак. Футбол жуда тезлашган. Агар кимдир сафдан чиқса, жуда қийин бўлади. Чунки захирамизда бошқа Шомуродов, Юсупов ёки Ҳусанов йўқ. Умид қиламанки,жароҳатлар бизни қийнамайди ва  Жаҳон чемпионатига оптимал таркибда етиб борамиз. Агар барчаси кўнгилдагидек кечса, гуруҳдан чиқиш вазифасини уддалашимизга ишонаман", — деди Рауф Инилеев.