Райан Гарсия - Конор Бенн жангида нокаут қайд этилди

Оқшомнинг асосий жангида ярим ўрта вазн тоифасида WBC чемпиони Райан Гарсия  британиялик даъвогар Конор Беннга қарши рингга кўтарилди ва рақибини иккинчи раунддаёқ техник нокаут эвазига мағлуб этди.

Ҳар икки рақиб жангни фаол бошлади. Гарсия қарши ҳужумларда ҳаракат қилган бўлса, Бенн яқин масофага кириб, зарбалар йўллади. Иккинчи раундда Гарсиянинг ўнг қўл билан йўллаган аниқ қарши зарбаси британиялик рақибини нокдаун ҳолатига туширди. Гарсия канат яқинида рақибини яксон қилишга киришди ва гарчи бошқа нокдаунлар бўлмаса-да, Бенн зўрға тик турганлиги сабабли ҳакам жангни тўхтатди.

Ғалабадан сўнг Гарсия WBA чемпиони Теофимо Лопесни жангга чорлади. Лопес рингга чиқишга уринди, бироқ қўриқчилар уни нима учундир киритишмади. Бунгача қўриқчилар Дэвид Бенавидесни ҳам тўхтатиб қолишган, бироқ кейинроқ уни Жей Опетаянинг олдига рингга ўтказиб юборишганди. Кийиниш хонасига кетаётиб, Гарсия DAZN телеканалига берган интервьюсида залдаги Теренс Кроуфорднинг ёнида ўтирган WBО чемпиони Дэвин Хейни билан эмас, айнан Лопес билан жанг қилишга қизиқаётганини яна бир бор тасдиқлади.

Бенн ҳакамнинг қарорига эътироз билдирмади. Ушбу жанг олдидан Бенн бу унинг ярим ўрта вазндаги сўнгги жанги эканлигини маълум қилганди. Бу яққол кўриниб турган эди, чунки тарозидан ўтгандан сўнг Бенн вазнини деярли 80 кг га кўтарганди. Унинг сўзларига кўра, у биринчи ўрта вазн тоифасини ўтказиб юбориб, ўрта вазн тоифасида жанг қилиш ниятида.