"Реал" Винисиусни "Эл Классико"даги реакцияси учун жазолайдими?

Якшанба куни "Реал" Ла Лиганинг 10-турида "Барселона"ни ўз майдонида 2:1 ҳисобида мағлуб этди.

Винисиус 72-дақиқа ўйинда Родриго билан алмаштирилди. Вингер бу қарордан норози бўлиб, майдонни тарк этди ва Хаби Алонсога қўл бермади. Кейинроқ дарвозабонлар мураббийи Луис Льопис билан суҳбатдан сўнг у захира ўриндиғига қайтди. Майдонни тарк этаётганда бразилиялик қўпол сўзлар билан "Мен жамоадан кетаман, менга кетганим яхши" деб такрорлаган.

Marca нашрининг хабар беришича, "Реал" Винисиусни бу ҳаракати учун жаримага тортмайди ва бошқа тарзда ҳам жазоламайди. Клуб раҳбарияти бу ҳолатни Алонсо ва Винисиус ўртасидаги шахсий масала деб ҳисобламоқда.

Шу билан бирга, клубда вазият ҳал этилган деб ҳисобланмоқда, чунки ўйиндан сўнг мураббий ва футболчи, жамоанинг қолган аъзолари билан биргаликда қўл сиқишиб, ғалабани бирга нишонлашган.

Шу билан бирга, айрим манбаларга кўра, "Реал"да Винисиуснинг алмашинувга реакциясидан норозилик бор ва у Алонсо қарорини ҳурмат қилиши кераклиги таъкидланмоқда. Клуб раҳбарияти бу ҳолат яна такрорланишини хоҳламайди.