"Ролан Гаррос". Аёллар ўртасидаги бош соврин ҳамда €2,550,000 кимга насиб этди?

Ҳал қилувчи финал учрашувида WTA рейтингида иккинчи ўринни эгаллаб турган америкалик Коко Гофф дунёнинг биринчи ракеткаси, беларуслик Арина Соболенкога қарши кортга чиқди. Биринчи сетни тай-брекда бой берган 21 ёшли Гофф камбэк қилишга муваффақ бўлди - 6/7(5), 6/2, 6/4.

Бу баҳсга қадар теннисчиларнинг ўзаро учрашувларида тенглик эди - 5:5. Коко чемпионлик эвазига ҳисобда олдинга чиқиб ҳам олди. Икки соату 38 дақиқа давом этган баҳсда Гофф 3, Соболенко 2 та эйс зарбасини амалга оширган. Қўшхатолар ғолибада кўпроқ бўлди - 8 га 6. Брейклар бўйича устунлик ҳам табиийки америкалик теннисчи томонида бўлди - 9 га 6! 

Шу тариқа, Гофф "Катта Дубулға" турнирларининг икки карра ғолибасига айланди. У US Open-2023 чемпиони ҳисобланади. Ўша финалда ҳам Коко Соболенкони мағлуб этганди. Гофф бу йилги мавсумдаги илк WTA совринини қўлга киритди. Чемпиолик унга 2000 рейтинг очкоси ҳамда 2 миллион 550 минг евро мукофот пули келтирди. Соболенко эса икки ҳафталик меҳнатидан 1300 очко ҳамда 1 миллион 275 минг евро пул ишлаб олди.