"Ролан Гаррос". Даниил Медведев илк даврадаёқ 81-ракеткага ютқазиб қўйди

Дунёнинг 11-ракеткаси Даниил Медведев биринчи босқичда ATP рейтингида 81-поғонани эгаллаб турган британиялик Кэмерон Норрига 5/7, 3/6, 6/4, 6/1, 5/7 ҳисобларида имкониятни бой бериб қўйди. Норри теннисчиларнинг ўзаро бешинчи учрашувига келиб илк бор Даниилни мағлуб этишнинг уддасидан чиқди - 1:4.  

Уч соату 53 дақиқа давом этган баҳсда Медведев 16, Норри эса 1 тагина эйс зарбасини амалга оширган. Иккала теннисчи ҳам брейклар сони 6 тадан бўлди. Медведев фаолиятида олтинчи бор "Ролан Гаррос" турнирининг илк даврасидаёқ мағлубиятга учради. Бунгача у 2017 йилдан 2020 йилгача, шунингдек, 2023 йилда ҳам айнан стартдаёқ ютқазиб қўйганди. 

Яхшигина шов-шув кўтарган Норри эса энди иккинчи даврада Федерико Агустин Гомесга қарши кортга чиқади. Аргентиналик теннисчи ўз ўрнида биринчи босқичда мерикалик Александар Ковачевичдан устун келди - 4/6, 6/4, 6/4, 6/1.