Россия Қозоғистонда ўтказиладиган World Boxing Жаҳон чемпионатида иштирок этмоқчи

Бу ҳақда Россия бокс федерацияси Мураббийлар кенгаши раиси Эдуард Кравцов маълум қилди.

"Саралаш баҳслари келаси йилдан бошланади. Биз келаси йил баҳорида Қозоғистонда ўтадиган жаҳон чемпионатида қатнашишга тайёргарлик кўряпмиз", — деди Кравцов.

Аввалроқ Россия спорт вазири Михаил Дегтярёв World Boxing ташкилоти россиялик боксчиларга нисбатан чекловларни бекор қилгани ва уларга халқаро мусобақаларда миллий байроқ ҳамда мадҳия билан иштирок этишга рухсат берганини маълум қилган эди. Унинг сўзларига кўра, Россиянинг ҳуқуқларини тиклаш масаласи 2026 йил январь ойида Тошкент шаҳрида World Boxing президенти ва Қозоғистон Миллий олимпия қўмитаси раҳбари Геннадий Головкин билан муҳокама қилинган.

2026 йил март ойида ташкилотнинг ижроия кенгаши Россия бокс федерациясининг World Boxing сафига қўшилиш ҳақидаги аризасини маъқуллади. Апрель ойида россиялик боксчиларга нейтрал мақомда турнирларда қатнашишга рухсат берилган эди, эндиликда эса улар мамлакатни миллий рамзлар остида намоён эта олади.