Россияга таъқиқ қўйганлар АИБАни текширади

Бу ҳақда хабар тарқатган Халқаро олимпия қўмитаси сайтининг қайд этишича, мазкур компания мутахассислари Россия спортчиларининг допинг билан боғлиқ жараёнларини ўрганганлиги ва суд-экспертиза хулосасига кўра, Россия спортчиларини халқаро спорт мусобақаларида мамлакат байроғи остида тушишини таъқиқлашган эди.

Компания раҳбари Ричард Маклареннинг фикрича, АИБА раҳбарияти билан келшувга биноан, Токио олимпия ўйинларида иштирок этиш ва олимпия бокс мусобақаларини бошқаришдан маҳрум қилинган халқаро бокс ташкилотини халқаро олимпия қўмитаси олдидаги ишончсизлик майдонидан чиқаришда ўтган олимпия ўйинларидаги коррупцион жараёнларни очиб ташлаш муҳим вазифа ҳисобланади.

2020 йили сайланган АИБА президенти У.Кремлев “ҳар қандай ҳолатда ҳам халқаро бокс ташкилоти олимпия оиласи олдида, жаҳон бокс хамжамияти олдида ўз ҳақ-ҳуқуқларини тиклаб олиши, ноқонуний ҳатти-ҳаракатлардан ҳимояланиб олиши лозим. Ёруғ келажакка етишиш учун энг аввало утмишдаги туманли даврларни ёрқинроқ кўриб олишимиз, барча-барча ноаниқликларни юзага чиқаришимиз, ечимини кутаётган саволларнинг жавобини топишимиз даркор бўлади. Шу маънода мустақил экспертлар гуруҳи холатни ўрганиши керак, деган фикрга келдик. Бу борада профессор Ричард Маклареннинг жамоасига ишонамиз”, - дея иқтибос келтирган.

Ўз навбатида MGSS етакчиси Макларен, унинг жамоасига ишонч билдирганлиги учун АИБА раҳбариятига миннатдорлик билдириб, холис текширувни амалга оширишда боксга алоқадорларни ҳамкорликка чақирган ҳамда илк хулосаларни жорий йилнинг август ойи охиригача эълон қилишини билдириб ўтди, дейилади Халқаро олимпия қўмитаси ҳисоботида.

Тўлқин РЎЗИЕВ.