Руслан Абдуллаев 2026 йил бошида проф боксдаги тўртинчи жангини ўтказади

23 яшар чарм қўлқоп устамиз 2026 йилнинг 16 январь куни АҚШнинг Калифорния штати, Палм-Дезерт шаҳрида ташкил этиладиган Golden Boy проф бокс оқшоми доирасида рингга қайтади.

Ҳозирча Русланнинг рақиби ким бўлиши ҳақида маълумот берилмаган.

Абдуллаев иштирок этадиган мусобақанинг марказий жанги америкалик Алексис Роха ва Мексика вакили Рауль Куриэль ўртасида кечади.

Руслан Абдуллаев 2023 йилда -63,5 кг вазн тоифасида жаҳон чемпионатининг олтин медалига сазовор бўлган. У профессионал рингдаги дебютини шу йилнинг март ойида ўтказиб, иккинчи раундда Хосе Алварадо (3-19-1, 2КО)ни нокаутга учратганди. Ушбу мағлубият Алварадо фаолиятидаги илк муддатидан олдинги мағлубият бўлган эди.

Руслан Абдуллаев профессионал боксдаги иккинчи жангида Жино Родриго (13-4-2, 11КО)ни бир овоздан (барча ҳакамлик ёзувларида 80-71) мағлуб этган бўлса, учинчи жангида Кевин Жонсон (12-7, 8КО)дан ҳам ҳакамларнинг якдил қарори билан (80-72, 79-73, 79-73) устун келганди.