Руслан Абдуллаев рингга чиққан турнирнинг икки чемпионлик жанги муддатидан аввал якунланди

Ушбу оқшом доирасида икки чемпионлик жанги муддатидан аввал якунига етди. Минимал вазнда WBA ва WBO йўналишлари чемпиони Луис Коллацо ҳамда аёлларнинг ўта енгил вазн тоифасида мутлақ жаҳон чемпиони Габриэла Фундора ўз камарларини муваффақиятли ҳимоя қилишди. Лекин ҳар икки баҳсда жангнинг тўхтатилиши бошқача бўлди. 

Себастьян Фундоранинг 23 ёшли синглиси Габриэла Фундора рақибаси Алексас Кубицкини еттинчи раундда техник нокаутга учратди. Оғир зарбалар сериясидан кейин рефери Рэй Корона жангни тўхтатишга қарор қилди. 

Коллацо эса филиппинлик Жейсон Вейсонга қарши рингга кўтарилди. Ушбу жанг анча рақобатли тус олди. Биринчи раундда даъвогар нокдаун ҳолатига тушиб қолди. Еттинчи раундда Вейсонниг секундантлари ринг марказига мағлубиятни тан олиш маъносида оқ сочиқ ирғитишди. Жейсон эса ўша вазиятда зарба ўтказиши баробарида ўзи ҳам жавоб бераётганди. Жанг тўхтатилган вазиятда Коллацо уччала ҳакамнинг ён дафтарчасида 59-54 ҳисобида ғалаба қозонаётганди.