Руслан Нурудинов яна шоҳсупанинг юқори поғонасида

Мазкур турнир Осиё/Океания минтақасининг етакчи атлетлари учун йилнинг муҳим стартлари — Осиё ўйинлари ҳамда Жаҳон чемпионати олдидан муҳим тайёргарлик босқичи сифатида эътироф этилди.

Мусобақанинг энг кўп қизиқиш уйғотган йўналишларидан бири -110 кг вазн тоифасидаги баҳслар бўлиб, унда чемпионлик учун рақобат икки атлет — ҳамюртимиз Руслан Нурудинов ҳамда қозоғистонлик Артём Антропов ўртасида кечиши керак эди. Аммо 2024 йилги жаҳон чемпиони ҳисобланган Антропов виза муаммоси сабаб орол давлат Самоага етиб бора олмади. 

Олимпиада ва Жаҳон чемпиони ҳамда рекордчиси Руслан Нурудинов иккикураш натижасига кўра 400 кг натижа билан мусобақа чемпионлигини қўлга киритди. Ҳамюртимиз даст кўтаришда 178 кг, силтаб кўтаришда 222 кг оғирликни ўзига бўйсундирди. 

"47 соат парвоздан кейин, бор йўғи бир кун машғулот ўтказиб, икки курашда 400 кг натижа қилдим. Борига шукур!", - деди Нурудинов.