“Sahibkiran Cup 2023” III халқаро турнирининг ғолиб ва совриндорлари маълум ФОТОГАЛЕРЕЯ

Умумий соврин жамғармаси 20 минг АҚШ доллари бўлган нуфузли турнирда 13 та давлатдан 164 нафар шахматчи иштирок этди. Сўнгги кун мусобақанинг ғолиб ва совриндорлари тантанали равишда тақдирланди.

Биринчи ўрин қозоғистонлик Алишер Сулейменовга насиб этди. У 9 имкониятдан 7 очко билан якка пешқадам бўлди. Иккинчи ўринни Платон Галперин (Украина) эгаллади. Унинг ҳисобида 6,5 очко бор. Кучли учликда озарбойжонлик шахматчи Вугар Расулов ҳам 6,5 очко билан мусобақани тугатди.

Аёллар ўртасидаги беллашувларда Нилуфар Ёқуббоевага тенг келадигани топилмади. Ғолиб ва совриндор бўлганлар орасида Умида Омонова, Муҳаммадзоҳид Суяров, Олмос Раҳматуллаев, Владимир Егин, Ҳумоюн Бекмуратов каби иқтидорли шахматчилар бор.

Ташкилотчилар томонидан таъсис этилган пул мукофотлари, сертификат ҳамда медаллар ғолиб ва совриндорларга тантанали суратда топширилди.

Алимурод МАМАДАМИНОВ, ўз мухбиримиз