Сербиядаги илк UFC турнири ташкилотнинг иккита рекордини янгилади

Ушбу оқшомда муддатидан олдин якунланган жанглар сони бўйича ташкилотнинг иккита рекордини ўрнатилди. UFC тарихида Сербияда ўтказилган илк турнир ҳам биринчи раунддаги финишлар (муддатидан олдин якунланган жанглар), ҳам умумий муддатидан олдин эришилган ғалабалар сони бўйича рекордчи бўлди.

Турнир доирасида жангчилар биринчи раунднинг ўзида 10 та муддатидан олдин ғалабага эришиб, аввалги еттиталик рекордни янгилашди. Турнирда жами 12 та муддатидан олдин якунланган жанг қайд этилди, бу ҳам UFC учун янги рекорд ҳисобланади. Аввалги кўрсаткич 11 та финишни ташкил этган эди.

Оқшомнинг марказий жанги сербиялик Урош Медич ва америкалик Даниэль Родригес ўртасида кечди. Медич биринчи раунднинг атиги 30-сониясида техник нокаут эвазига ғалаба қозонди.

Яна бир финишни старт раундида Янги Зеландия вакили Наваҳо Стирлинг расмийлаштирди. У UFC`нинг ярим оғир вазн тоифасидаги собиқ чемпиони, польшалик Ян Блаховични техник нокаут эвазига мағлуб этди. Аслида кеча Наваҳо ўрнида ҳамюртимиз Богдан Гусков Блаховичга қарши реванш жангида октагонга чиқиши керак эди.