15 ноя 13:00
Янгиликлар

Теннис

Сергей Фомин Баҳрайндаги турнирда 1/2 финалга чиқди

Баҳрайн пойтахти Манама шаҳрида теннис бўйича M25 тоифасига кирувчи турнир давом этмоқда.

Унда ҳамюртимиз Сергей Фомин ҳам муваффақиятли одимлаяпти. Мамлакатимизнинг иккинчи ракеткаси мусобақанинг ярим финал иштирокчисига айланди. Турнирда тўртинчи рақам остида таснифланган Фомин 2 соату 23 дақиқа давом этган 1/4 финалда германиялик Нино Эхреншнейдерни қийинчилик билан уч сет натижасига кўра таслим этди - 7/6(2), 1/6, 6/0.

Таққослаш учун, Фомин ATP рейтингида 404, турнирда саккизинчи рақам остида ҳаракат қилган Эхреншнейдер 585-поғонадан жой олган. Бугун ҳамюртимиз финал чиптаси учун яна бир германиялик теннисчи Максимилян Хомбергга қарши кортга чиқади. Хомберг рейтингда 959-поғонадан жой олган. Фомин - Хомберг учрашуви бизнинг вақт билан соат 16:00да бошланади.