Шаҳрам Ғиёсов 12 апрель куни ким билан жанг қилиши маълум. Бу ҳамюртимиз учун чемпионлик баҳсидан олдинги имтиҳон бўлади (ФОТО)

Аввал хабар берганимиздек, Шаҳрам "Wonderboy" Ғиёсов 12 апрель куни Нью-Жерсида ташкил этиладиган проф бокс оқшомида рингга кўтарилади. Унга олдинроқ айтилганидек мексикалик боксчи эмас, Аргентина вакили Франко Максимилиано Окампо рақиб бўлади. 

Шаҳрам фаолияти давомида 16 та проф жанг ўтказиб, уларнинг барчасида ғалаба қозонган бўлса, Окампо ҳисобида 17 та ғалаба ва 2 та мағлубият мавжуд.

Атлантик Сити шаҳрида ташкил этиладиган бокс турнирининг марказий жанги ярим ўрта вазнда WBA чемпиони Эймантас Станионис ҳамда IBF чемпиони Жейрон Эннис ўртасида кечади. Шаҳрам эса бўлажак жангида ғалаба қозонса, кейинги жангини айнан Эннис — Станионис баҳси ғолибига қарши ўтказади.

Эслатиб ўтамиз, март ойи аввалида 31 ёшли боксчимизнинг фарзанди бу ёруғ оламни тарк этганди.